काठमाडौं । सिधाकुरा डटकमको ‘द डार्क फाइल’ श्रृंखलामा प्रकाशित सामग्रीविरुद्ध साइबर अपराधमा मुद्दा चलेको छ । नेपाल प्रहरीको केन्द्रीय अनुसन्धान ब्युरोको अनुसन्धान प्रतिवेदनका आधारमा जिल्ला सरकारी वकिल कार्यालय काठमाडौंले मुद्दा दायर गरेको हो । 

जिल्ला सरकारी वकिल कार्यालय काठमाडौंका प्रमुख सन्देश श्रेष्ठले बिहीबार नै मुद्दा दायर गरेको जानकारी दिए । उनले भने, “प्रहरी प्रतिवेदनको आधारमा बिहीबार नै मुद्दा दायर गरेका छौँ ।” 

काठमाडौं जिल्ला अदालतमा दायर गरिएको मुद्दामा सिधाकुराका सम्पादक नवीन ढुंगाना, प्रकाशक युवराज कँडेल र अडियो रेकर्ड गरेको भन्ने राजकुमार तिमिल्सिनालाई विपक्षी बनाइएको उनले पुष्टि गरे । 

अदालतमा समेत उस्थित भएका उनीहरू तीनैजनालाई मुद्दामा फरार प्रतिवादी बनाइएको छ । सिधाकुरा डटकमले अख्तियारले आफ्नै पैसा दिएर गर्दै आएका ‘स्टिङ अप्रेसन’का मुद्दा मिलाउन सर्वोच्च अदालतका न्यायाधीशसमेतको मिलेमतोमा ‘डिल’ भएको भन्दै ‘द डार्क फाइल’ श्रृंखला प्रसारित/प्रकाशित गरेको थियो । 

अन्नपूर्णपोष्टको तीनकुनेस्थित कार्यालयमा भएको ‘डिल’ भन्दै प्रशारित अडियो सर्वोच्चमा अवहेलना मुद्दा चलाएसँगै नेपाल प्रहरीको विधिविज्ञान प्रयोशालामा परीक्षणका लागि पठाइएको थियो । प्रहरीले फरेन्सिक जाँच गर्दा अडियो ‘फेक’ भेटिएपछि उनीहरूविरुद्ध मुद्दा चलाइएको हो ।

मुद्दा चलाइएका तीनैजनाविरुद्ध सर्वोच्च अदालतल आफैँले सरोकारमा लिएर ‘सुमोटो’ चलाएको अवहेलना मुद्दा सर्वोच्चमा विचाराधीन छ । सर्वोच्चको संयुक्त इजलासले गत जेठ ३० गते बृहत् पूर्ण इजलासमा पठाउन आदेश गरेपछि नौजना न्यायाधीश सम्मिलित बृहत् पूर्ण इजलास बनाउने निर्णय भएको छ । तर, बृहत् पूर्ण इजलासको लागि पेसी मिति भने तोकिसकेको छैन ।