काठमाडौं । नारायणगढ–मुग्लिन सडकखण्डस्थित सिमलतालमा पहिरोसँगै बगेर त्रिशूली नदीमा बेपत्ता दुई बस तथा यात्रुको खोजी कार्यमा खासै प्रगति देखिएको छैन ।

आज घटना भएको १४ दिन बितिसक्दा पनि नेपाल र भारतको संयुक्त सुरक्षा फौजबाट खोजतलास जारी छ । तर, अहिलेसम्म बेपत्ता गाडी र बाँकी यात्रुबारे कुनै पनि नयाँ संकेत नमिलेको सशस्त्र प्रहरी बल नेपालका केन्द्रीय सहप्रवक्ता प्रहरी नायब उपरीक्षक शैलेन्द्र थापाले जानकारी दिए ।

पाँच दिनदेखि सशस्त्र प्रहरी बल नेपालको गोताखोरसहित भारतको राष्ट्रिय आपदा मोचन बल (नेसनल डिजास्टर रेस्पोन्स फोर्स) बाट १२ जनाको प्राविधिक टोलीले संयुक्तरूपमा खोजी गरिरहेको छ । 

थापाका अनुसार सिमलतालदेखि भारतीय सीमा क्षेत्र गण्डक ब्यारेजसम्मै विभिन्न क्षेत्रबाट टोली परिचालन गरेर खोजी भइरहेको छ ।  गत शनिबार चितवन आइपुगेको भारतीय प्राविधिकसहितको टोलीले आइतबार बिहानबाट खोजी कार्य थालेको थियो ।

गत असार २८ गते शुक्रबार वीरगञ्जबाट काठमाडौंतर्फ आउँदै गरेको वाग्मती प्रदेश ०३–००६ ख १५१६ नम्बरको एन्जल डिलक्स र काठमाडौंबाट गौरतर्फ जाँदै गरेको वाग्मती प्रदेश ०३–२४९५ ख ००१ नम्बरको गणपति डिलक्स बस सिमलतालमा खसेको पहिरोसँगै बगेर त्रिशूली नदीमा बेपत्ता भएका थिए । 

बसमा सवार ६५ जनामध्ये तीन जना सकुशल निस्किएका थिए भने ६२ जना बेपत्ता भएका थिए । बेपत्तामध्ये अहिलेसम्म २५ जना मृत अवस्थामा भेटिएका छन् । अझै दुई बससँगै ३७ यात्रुको अवस्था पत्ता लाग्न सकेको छैन । रासस