काठमाडौं । कवि श्रवण मुकारुङका कविता चलचित्र ‘दुखी आत्मा’ले प्रयोग गर्ने भएको छ । कवि मुकारुङले ‘दुखी आत्मा’का लागि विभिन्न शीर्षकका १० वटा कविता लेखेका छन् ।

दीपेन्द्र लामाको लेखन तथा निर्देशन रहेको ‘दुखी आत्मा’को पटकथा अनुसार कवि मुकारुङका कविता चलचित्रभित्र सन्दर्भअनुसार राखिएको बताइएको छ ।

“चलचित्रका फराकिला दर्शक समूहमाझ कविता पुग्नु कुनै पनि स्रष्टाका लागि उत्साहजनक हो,” कवि मुकारुङले भनेका छन्, “म आफ्ना कवितालाई फरक प्लेटफर्ममा हेर्न आतुर छु ।” 

चलचित्रको प्रमुख पात्रको मनोविज्ञान र यसअघि मुकारुङले लेखेका कविताहरूको स्वभावबीच एकरुपता पाइएकोले उनलाई कविता रच्न लगाइएको निर्देशक लामाले बताएको निर्माणपक्षले जारी गरेको प्रेसनोटमा उल्लेख छ । 

कवि मुकारुङका कविताले चलचित्रको कलात्मक उचाइ र कथाको आयामलाई बढाउने निर्देशक लामोको विश्वास छ । 

मुकारुङका अधिकांश कविता ‘दुखी आत्मा’का प्रमुख अभिनेता दयाहाङ राईमाथि फिचरिङ गरिएको निर्देशक लामाले बताएका छन् । 

सुदीप ढकाल कार्यकारी निर्माता रहेको चलचित्रमा दयाहाङ राई, आँचल शर्मा, अनुपविक्रम शाही, बुद्धि तामाङ, रेयर राईलगायत कलाकार मुख्य भूमिकामा छन् । 

आलोक शुक्लाले खिचेको चलचित्र भ्यालेन्टाइन डेको अवसरमा फागुन २ गतेबाट प्रदर्शन हुँदै छ ।