काठमाडौं । नेपाली कथानक चलचित्र ‘ममी’को गीत सार्वजनिक गरिएको छ । एसडी योगीको संगीत रहेको ‘म त यसै नक्कली’ बोलको गीतमा हर्क साउदको शब्दरचना छ । समीक्षा अधिकारी र विज्ञानी पराजुलीको स्वर छ । 

गीतको भिडियोमा चलचित्रका दुई मुख्य अभिनेत्री प्रियंका कार्की र दीया मास्के फिचर्ड छन् । विक्रम स्वाँरको कोरियोग्राफी रहेको गीतमा निशाल पौडेलको छायांकन र टेकेन्द्र शाहको सम्पादन छ ।      

समर निरौलाको डेव्यु निर्देशन रहेको ‘ममी’ले परिवारले पालेको कुकुरको निधनपछि छोरीले घरमा कालो बिरालो पाल्न थालेपछि परिवारमा निम्तिने विपत्तिको श्रृंखलाको कथा पेस गर्छ ।

माघ २५ गते रिलिज हुने चलचित्रमा प्रियंका कार्की, दीया मास्के, सुलक्षण भारतीको मुख्य भूमिका छ । 

समर निरौला र पूर्णिमा जोशीको लेखन रहेको चलचित्रमा निर्माता लोकराज जोशी तथा पूर्णिमा जोशी हुन् । कार्यकारी निर्मातामा सुमन कोइराला छन् ।