काठमाडौं । नेपालयको आरसालामा आयोजना हुँदै आएको सांगीतिक कार्यक्रम पलेँटीमा यसपटक गीतकार कालीप्रसाद रिजाल र आभासबीच सहकार्य हुने भएको छ । कालीप्रसाद रिजालका नयाँ गीतमा आभास आफ्नो धून र स्वरसहित मार्च २८ र २९ मा पलेँटीमा प्रस्तुत हुने भएका छन् ।

लामो समयपछि आफू गीतकारका रूपमा विशेष श्रोताहरुबीच आउन लागेको रिजालले बताए । “नयाँ गीत लेखिरहेकै थिएँ तर चित्तबुझ्दो संगीतकार आभासजीलाई पाएपछि म सहकार्य गर्न उत्सुक भएको हुँ,” गीतकार रिजाल भन्छन्, “पहिले पनि मेरो आत्मसंस्मरण काँडामा हाँसेको जिन्दगी लोकार्पणका बेला नेपालयसँग म जोडिएको थिएँ । तर यसपटकको सहकार्य म आफैँलाई विशेष लागिरहेको छ ।”

रिजालका केही मीठो बात गर, आँखा छोपी नरोऊ भनी, झरेको पातझैँ, झर्‍यो जिन्दगी, यसै गरी बिताइदिन्छु, माया गर्नेको चोखो मायाजस्ता गीत नारायणगोपालको स्वर र संगीतमा सजिए । यी सदाबहार गीत पनि यसपालिको पलेँटीमा प्रस्तुत हुनेछन् । यसैगरी अम्बर गुरुङले संगीत गरेका दुई गीत कहीँ आफ्नै भुमरीमा र अर्को एक रमाइलो गीत पनि पलेँटीमा प्रस्तुत हुनेछ ।

२० वर्षदेखि पलेँटी संयोजन गर्दै आएका आभास यसपालि संगीतकार र गायकका रूपमा पलेँटीमा प्रस्तुत हुँदैछन् । रिजालका आठ नयाँ गीतमा उनले धुन भरेका छन् । 

पलेँटीकै क्रममा रिजालका नयाँ र पुराना गीत र कविताको संग्रह ‘केही मीठो बात गर’ पुस्तक पनि लोकार्पण हुनेछ । पुस्तकमा रिजालमा नयाँ र पुराना २० कविता संगृहीत छन् । यसैगरी उनका नयाँ र पुराना ६८ गीत पुस्तकमा समेटिएका छन् । 

रिजालका पुराना लोकप्रिय गीतहरू अभिज्ञा घिमिरे र बेनुप क्षेत्रीले गाउनेछन् । सम्पूर्ण पलेँटीमा सुनील सिंह, सुन्दरकुमार महर्जन, मिलन घिमिरे, कृपेश लोहनी, लक्ष्मीप्रसाद डंगोलले वाद्यवादनमा साथ दिनेछन् ।